‘ट्रिकी’ पिचमा आसिफले बनाएको कीर्तिमानी दोहोरो शतक
चैत, काठमाडौं । यस वर्षको अन्तिम दिन नेपाली क्रिकेटका लागि शानदार रह्यो । वर्षको अन्त्य हुँदाहुँदै नेपाली क्रिकेटकै दुर्लभ कीर्तिमान आज बन्यो ।
मधेश प्रदेशमा भइरहेको पीएम कप पुरुष राष्ट्रिय क्रिकेट प्रतियोगितामा मंगलबारका दुवै खेलमा केही कीर्तिमानहरू बन्दा तीमध्ये एउटा थियो- आसिफ शेखको दोहोरो शतक ।
विश्व क्रिकेटमै दोहोरो शतक दुर्लभ हुने गर्छ, विशेषगरी ५० ओभरको खेलमा । त्यसमाथि नेपाली क्रिकेटको यो स्तरको प्रतियोगितामा त शतक नै बन्नु पनि ठूलो कुरा मानिन्छ ।
ट्रिकी पिचमा संयमित पारी
मधेश प्रदेशका जनकपुर र वीरगन्जमा भइरहेको पीएम कपमा बलरहरू हावी भएको देखिँदै आएको थियो । तर सोमबार भने फरक दृश्य देखियो । दुवै खेलमा ३५० भन्दा माथिको योगफल बनेको थियो ।
वीरगन्जमा एपीएफले ५० ओभरमा ४ विकेट गुमाएर ३९० रन बनाएको थियो । यो पीएम कप इतिहासकै सर्वाधिक योगफल थियो । उता जनकपुरमा त्रिभुवन आर्मी क्लबले ३६२ रनको योगफल बनाएको थियो । त्यहाँ पनि झन्डै दोहोरो शतक प्रहार भएको थियो ।
आर्मीका कप्तान विनोद भण्डारीले १८९ रन बनाएका थिए । आर्मीले आफ्नो पीएम कप इतिहासकै उच्च योगफल बनायो । दुवैतर्फको योगफल यसअघिको उच्च योगफलभन्दा बढी हुन् ।
एपीएफको विशाल योगफलमा आसिफले २०८ रन बनाएर रिटायर भएका थिए । १४२ बल खेलेका उनले १५ चौका र १७ छक्का प्रहार गरे ।
यसअघिको व्यक्तिगत उच्च स्कोर एपीएफकै प्रदिप ऐरीको नाममा थियो । उनले सन् २०१८ को पीएम कपमा मधेश प्रदेश (त्यसबेला प्रदेश नं २) विरुद्ध १५८ रन बनाएका थिए ।
आसिफले सुरुमा पिच अलिकति कठिन देखिएको तर विस्तारै समय लिएर इनिङ बिल्ड गर्दै लगेको बताए । ‘सुरुमा अलिकति गाह्रो थियो विकेटमा खेल्न, विस्तारै समय लिएर खेल्दै गएपछि इनिङ बिल्ड भयो । दोहोरो शतकको बारेमा सोचेको थिइनँ । समय लिएर खेल्दै गएपछि सजिलो भयो’ आसिफले भने ।
उनले साझेदारी बनाउने नै मुख्य प्राथमिकतामा राखेको बताए । ‘विकेट चाँडै गएको थियो, कप्तान रोहितसँग साझेदारी बनाएर खेल्ने योजना थियो, त्यही अनुसार सफल भयौं’ उनले भने ।
यता अर्को खेलमा विनोद भण्डारी पनि दोहोरो शतकको नजिक पुगेर आउट भए । अन्तिम ओभरको तेस्रो बलमा विनोद आउट भएका थिए । केही महत्त्वाकांक्षी शट प्रयासमा उनी बोल्ड भएका थिए ।
विनोद पीएम कपमा सर्वाधिक शतक प्रहार गर्ने खेलाडी समेत हुन् । उनले यसै संस्करणमा आजको सँगै २ शतक बनाएका छन् भने समग्रमा ५ शतक बनाएका छन् ।
विनोदले संक्षिप्त प्रतिक्रिया दिँदै पछिल्लो समय पिचमा धेरै मोइस्चर नभएकाले ब्याट बलमा राम्रोसँग आएको बताए । ‘पानी परेको थिएन धेरै समय, पिच हार्ड थियो अनि बल ब्याटमा राम्रोसँग आयो’ विनोदले भने ।
नेपाली क्रिकेटकै प्रतिष्ठित दोहोरो शतक
आसिफले सोमबार बनाएको दोहोरो शतक कीर्तिमानसँगै नेपाली घरेलु क्रिकेटकै प्रतिष्ठित समेत हो । यसअघि पनि दोहोरो शतक त प्रहार भएका छन् तर जिल्ला छनोट र उमेर समूहको प्रतियोगितामा
यसअघि यो स्तरको प्रतियोगितामा कुनैपनि दोहोरो शतक प्रहार भएका थिएनन् । पीएम कपको जिल्ला तथा प्रदेश सेलेक्सन प्रतियोगिता अनि यू-१६ क्रिकेटमा दोहोरो शतक प्रहार भएका छन् ।
मधेश प्रदेशअन्तर्गत सप्तरी जिल्लाको छनोट खेलका क्रममा कंकालिनी सप्तरीका ब्याटर अमित कुमार यादवले दोहोरो शतक प्रहार गरेका थिए ।
लोहजरा सप्तरीविरुद्धको खेलमा ओपनिङ गरेका अमितले १७५ बलमा २७८ रनको शानदार पारी खेलेका थिए । यस क्रममा उनले ३८ चौका र १२ छक्का प्रहार गरेका थिए ।
त्यस्तै यू-१६ राष्ट्रिय क्रिकेटमा लुम्बिनी प्रदेशका रौनक श्रीवास्तवले गण्डकी प्रदेशविरुद्धको खेलमा ११७ बल खेलेर १६ चौका र १६ छक्कासहित २१७ रन बनाएका थिए ।
यस्तै सन् २०२१ को पीएम कप छनोटमा ललितपुरबाट खेलेका आदिल खानले २०१ रन बनाएका थिए ।
सन् २००३ मा सप्तरीका खेलाडी मेहबुब आलमले रिजनल लिगअन्तर्गत उदयपुरसँगको खेलमा २५६ रन बनाएका थिए ।
