काठमाण्डौ – वर्षाका कारण अवरुद्ध भएको बुटवल–नारायणगढ सडकखण्ड खुलेको छ ।
पूर्वपश्चिम राजमार्गअन्तर्गत नवलपरासी (बर्दघाट सुस्तापूर्व)को विनयी त्रिवेणी गाउँपालिका–२ दाउन्ने सडक खण्डमा हिलो र चिप्लो हुँदा अवरुद्ध भएको सडक एकतर्फी खुलेको हो । सडक दुईतर्फी नै खुलाउने प्रयास भइरहेको नवलपरासी प्रहरीले जनाएको छ ।
प्रहरीका अनुसार अहिले दुवैतर्फबाट आलोपालो गाडी चलिरहेका छन् र जाममा बस्नुपर्ने अवस्था छैन । बुटवल–नारायणगढ सडकको दाउन्ने खण्डमा वर्षाले गाडी आवागमनमा समस्या भएपछि अहिले ‘ग्राभेल’ हालेर मर्मतको काम भइरहेको नारायणगढ–बुटवल सडक आयोजनाले जनाएको छ ।
बुटवल–नारायणगढ सडक विस्तारअन्तर्गत दाउन्ने खण्डमा निर्माणको काम नसकिँदा सामान्य वर्षामा पनि सडक अवरुद्ध हुने गरेको छ ।
अन्तिम अपडेट: चैत २६, २०८२
