मोगादिसु । सोमालियाले आफ्नो इतिहासमै पहिलो पटक अफशोर तेल उत्खनन सुरु गर्ने तयारी गरेको छ । टर्की सरकारको स्वामित्वमा रहेको ड्रिलिङ जहाज यही शुक्रबार सोमालियाको तट नजिक पुग्ने अपेक्षा गरिएको छ । यो कदम गत वर्ष टर्कीको अनुसन्धान जहाजले सफलतापूर्वक गरेको सिस्मिक सर्वेक्षणपछि अगाडि बढाइएको हो, जसले समुद्रभित्रको हाइड्रोकार्बन सम्भावना पहिचान गरेको थियो ।
सोमालियाका पेट्रोलियम मन्त्री दाहिर शायरले सामाजिक सञ्जालमा यसलाई अफशोर ऊर्जा यात्राको ऐतिहासिक उपलब्धि भन्दै नयाँ अध्यायको सुरुवात बताएका छन् । टर्कीको टर्किस पेट्रोलियम कर्पोरेशनको ड्रिलिङ जहाज काग्री बे पहिलो अन्तर्राष्ट्रिय मिशनमा अरब सागर हुँदै सोमालियाको समुद्री क्षेत्रमा प्रवेश गर्नेछ । उक्त जहाजले गहिरो समुद्रमा हालै पहिचान गरिएका सम्भावित क्षेत्रमा ड्रिलिङ गर्नेछ ।
उत्खनन सफल भएमा यसले सोमालियाको अफशोर तेल भण्डार उपयोगमा ल्याउने र देशको आर्थिक पुनरुत्थानमा सहयोग पुर्याउने अपेक्षा गरिएको छ । सरकारले यसबाट प्राप्त लाभले जनताको जीवनस्तर सुधार गर्ने प्रतिबद्धता जनाएको छ । टर्की र सोमालियाबिच २०२४ मा उत्पादन साझेदारी सम्झौता भएको थियो, जसले ऊर्जा क्षेत्रमा सहकार्यलाई संस्थागत बनाएको छ ।
सोमालियाका विदेश मन्त्री यो परियोजनाले टर्कीलाई दीर्घकालीन विश्वसनीय साझेदारका रूपमा अझ मजबुत बनाउने अली ओमारले बताएका छन् । त्यस्तै, टर्कीका ऊर्जा मन्त्री अल्पार्सलान बायराक्तारले सम्भावित तेल वा ग्यासको खोजले सोमालिया, पूर्वी अफ्रिका र टर्की तीनैका लागि ठुलो आर्थिक लाभ ल्याउने बताएका छन् । टर्कीले पछिल्लो एक दशकदेखि सोमालियासँगको सम्बन्ध गहिरो बनाउँदै आएको छ र त्यहाँ विकास तथा सुरक्षा क्षेत्रमा लगानीसमेत बढाएको छ ।
