वासिंगटन डीसी । अमेरिकी राष्ट्रपति डोनाल्ड ट्रम्पले कुख्यात जेल अल्काट्राजलाई पुनः सक्रिय जेलका रूपमा सञ्चालन गर्न १५ करोड डलरभन्दा बढी बजेट मागेका छन् । ह्वाइट हाउसले सन २०२७ को आर्थिक वर्षका लागि प्रस्तुत गरेको बजेट प्रस्तावमा उक्त रकम समावेश गरिएको हो । यस्ता बजेट प्रस्तावहरूलाई अमेरिकी कंग्रेसले प्रायः सुझावका रूपमा लिने गर्छ ।
प्रस्तावअनुसार सङ्घीय जेल ब्यूरोलाई पहिलो वर्षका लागि अल्काट्राजलाई आधुनिक र उच्च सुरक्षायुक्त जेलमा रूपान्तरण गर्न आवश्यक खर्च उपलब्ध गराइनेछ । सन् १९६९ मा बन्द भएको यो जेल अहिले नेशनल पार्क सर्भिसअन्तर्गत पर्यटकीय स्थलका रूपमा सञ्चालित छ । ट्रम्पले गत वर्ष सामाजिक सञ्जालमार्फत अलकाट्राजलाई पुनः विस्तार गरी अमेरिकाका सबैभन्दा खतरनाक र हिंस्रक अपराधीहरूलाई राख्ने उद्देश्यले पुनः सञ्चालनमा ल्याउने निर्देशन दिएका थिए ।
सन १९३४ मा स्थापना भएको अलकाट्राज भौगोलिक अवस्थिति, चिसो पानी र बलियो समुद्री धारका कारण अमेरिकाको सबैभन्दा सुरक्षित जेलका रूपमा चिनिन्थ्यो। यहाँबाट कुनै पनि कैदी भाग्न सकेको आधिकारिक रेकर्ड छैन । पाँच कैदीहरू हराएका र सम्भवतः डुबेर मृत्यु भएको सूचीमा छन् । यो जेलमा कुख्यात अपराधीहरूलाई राखिएको थियो । जेल चलाउने खर्च धान्नै नसकेर अलकाट्राज बन्द गरिएको थियो। अन्य सङ्घीय जेलहरूको तुलनामा यसको सञ्चालन खर्च करिब तीन गुणा बढी थियो ।
