वीरगन्ज । पर्सा प्रतिनिधि सभा निर्वाचन क्षेत्र नम्बर–२ बाट राष्ट्रिय स्वतन्त्र पार्टी (रास्वपा)का उम्मेदवार सुशील कुमार कानु भारी मतान्तरसहित विजयी भएका छन् ।
निर्वाचन अधिकृतको कार्यालयका अनुसार रास्वपा उम्मेदवार कानुले नेपाली कांग्रेसका अजय चौरसियालाई १८ हजार ८५० मतान्तरले पराजित गर्दै प्रतिनिधि सभा सदस्यमा निर्वाचित भएका हुन् ।
कानुले कुल ३० हजार ७४० मत प्राप्त गरेका छन् । उनका निकटतम प्रतिद्वन्द्वी कांग्रेसका चौरसियाले ११ हजार ८९० मत प्राप्त गरेका छन् ।
यसैगरी नेकपा (एमाले)की उम्मेदवार रिमा यादवले ११ हजार ६०५ मत प्राप्त गरेकी छन् ।
नवनिर्वाचित सांसद कानुको राजनीतिक यात्रा भने स्थानीय तहबाट सुरु भएको हो ।
उनी यसअघि भएको स्थानीय तह निर्वाचनमा वडाध्यक्ष पदमा निर्वाचित भएका थिए ।
पर्सा क्षेत्र नम्बर–२ मा कुल ९५ हजार १२० मतदाता रहेका थिए ।
जसमध्ये ६५ हजार ८७८ मत खसेको निर्वाचन अधिकृतको कार्यालयले जनाएको छ ।
