काठमाडौँ । नेकपा एमालेका अध्यक्ष केपी शर्मा ओलीले प्रतिनिधिसभा निर्वाचनका दिन आफ्नो जीवनका दुई महत्वपूर्ण संयोग स्मरण गरेका छन् ।
सामाजिक सञ्जाल फेसबुकमार्फत उनले आज सुखानी शहीद दिवस परेको उल्लेख गर्दै यही दिन ६ वर्षअघि आफूले दोस्रो पटक मिर्गौला प्रत्यारोपण गरेको बताएका छन् । यी दुवै दिन आफू मृत्युको मुखमा पुगेर पुनर्जीवन पाएको दिन भएको उनले उल्लेख गरेका छन् ।
ओलीले झापा आन्दोलनले निरंकुश व्यवस्थाविरुद्ध विद्रोहको बिगुल फुकेको स्मरण गर्दै त्यसक्रममा आफूहरू जेल परेको बताएका छन् । जेल सार्ने बहानामा सुखानीको जंगलमा लगेर रामनाथ दाहाल, नेत्र घिमिरे, वीरेन राजवंशी, कृष्ण कुइँकेल र नारायण श्रेष्ठको हत्या गरिएको उनले स्मरण गरेका छन् ।
जेल सार्ने बहानामा हत्या गरिन लाग्दा आफू मृत्युको मुखबाट फर्किएको र १४ वर्ष कठोर कारावास भोगेको पनि उनले उल्लेख गरेका छन् ।
देशलाई लोकतन्त्रको उज्यालो बिहानीमा लैजान बलिदान गरेका अमर शहीदहरूप्रति उनले भावपूर्ण श्रद्धाञ्जली अर्पण गरेका छन् । उनले फागुन २१ कहिल्यै नबिर्सने दिन भएको उल्लेख गरेका छन् ।
