तेहरान । अमेरिका र इजरायली बमबारीमा परेर कक्षाकोठामै मारिएका इरानका छात्राहरूको अन्त्येष्टि सुरु भएको छ । इरानी अधिकारीहरूका अनुसार शनिबार बिहान दक्षिणी सहर मिनाबस्थित शाजारे तय्यिबा गर्ल्स प्राथमिक विद्यालयमा भएको हवाई आक्रमणमा कम्तीमा १६८ विद्यार्थीको मृत्यु भएको थियो ।
सरकारी प्रसारक इस्लामिक रिपब्लिक अफ इरान ब्रोडकास्टिङका अनुसार मङ्गलवार बिहान मिनाबको मुख्य चोकमा ठुलो भीड जम्मा भएको देखिएको छ । सडकहरू मानिसले भरिएका थिए, जहाँ मृत बालिकाहरूका तस्बिर बोकेर नाराबाजी गरिएको थियो ।
अर्ध सरकारी समाचार संस्था तास्मिन न्युज एजेन्सीका अनुसार एक पीडित बालिकाकी आमाले अमेरिकी पूर्वराष्ट्रपति डोनाल्ड ट्रम्पको आलोचना गर्दै उनका कदमलाई पागलपन भनेकी छन् ।
आक्रमणपछि इरानी सरकारी मिडियाले सार्वजनिक गरेको भिडियोमा विद्यालय पूर्ण रूपमा ध्वस्त भएको, बालबालिकाका झोला र पुस्तकहरू भग्नावशेषमा छरिएका र अभिभावकहरू शोकमा डुबेका दृश्य देखिएका थिए ।
उक्त विद्यालय इरानी सैन्य आधारबाट करिब ६० मिटर दूरीमा रहेको थियो । अमेरिकी सेन्ट्रल कमाण्डले सो घटनाको रिपोर्टबारे जानकारी रहेको र अनुसन्धान भइरहेको बताएको छ ।
