भ्रमपूर्ण विज्ञापन र बिचौलिया गतिविधि बन्द गर्न वैदेशिक रोजगार विभागको ३ दिने अल्टिमेटम
काठमाडौँ । वैदेशिक रोजगार विभागले कार्यालय आसपास र अन्य विभिन्न स्थानमा सञ्चालित साइबर सेन्टर तथा तालिम केन्द्रहरूलाई भ्रमपूर्ण विज्ञापन र बिचौलिया गतिविधि तत्काल बन्द गर्न निर्देशन दिएको छ।
विभागले शुक्रवार एक सार्वजनिक सूचना जारी गर्दै केही साइबर सेन्टर, तालिम केन्द्र र अन्य संस्थाहरूले ‘यहाँ श्रम गरिन्छ’, ‘श्रम स्वीकृति सम्बन्धी कार्य गरिन्छ’ वा ‘श्रम अनलाइन फारम भरिन्छ’ जस्ता भ्रामक शब्दहरू प्रयोग गरेर वैदेशिक रोजगारीमा जाने सेवाग्राहीलाई झुक्याइरहेको बताएको छ।
यस्ता संस्थाहरूले सेवाग्राहीलाई भ्रममा पारी, अनावश्यक आकर्षण देखाएर रकम असुल गर्ने र बिचौलियाका रूपमा काम गरिरहेको गुनासो र जानकारी प्राप्त भएपछि विभागले ध्यानाकर्षण भएको जनाएको छ
चैत ३० गतेभित्र बोर्ड हटाउनुपर्ने
विभागले त्यस्ता भ्रमपूर्ण लेखन तथा प्रचार–प्रसार तत्काल बन्द गर्न निर्देशन दिएको छ । सम्बन्धित व्यवसायी, साइबर, संस्था तथा व्यक्तिहरूलाई आफ्ना कार्यालयमा राखिएका प्रचार प्रसार गर्ने बोर्ड, होडिङ बोर्ड, फ्लेक्स बोर्ड र भित्ते लेखन लगायतका सामग्रीहरू आगामी चैत ३० गते सोमबारभित्र अनिवार्य रूपमा हटाउन निर्देशन दिइएको छ
प्रचलित कानुन बमोजिम श्रम स्वीकृति सम्बन्धी कार्य विभाग र तोकिएका श्रम तथा रोजगार कार्यालयहरूबाट मात्रै हुने कानुनी व्यवस्था छ। विभागको निर्देशन पालना नगरेको पाइएमा वैदेशिक रोजगार ऐन, २०६४ र अन्य प्रचलित कानुन बमोजिम कडा कारबाही गरिने व्यहोरा सूचनामा उल्लेख गरिएको छ।
विभागले सेवाग्राहीहरूलाई पनि आधिकारिक निकायबाट मात्रै सेवा लिन र बिचौलियाको भ्रममा नपर्न सचेत गराएको छ।
