काठमाडौँ । नेकपा एमालेले संसदमा विधिको शासन र संविधान प्रदत्त अधिकार सुनिश्चितताका लागि सरकारलाई खबरदारी गर्ने भएको छ ।
सङ्घीय संसद् सचिवालयले सोमबार राखेको सर्वदलीय बैठकमा एमालेले यस्तो अडान राखेको हो । सर्वदलीय बैठकपछि एमाले नेता गुरु बरालले पत्रकारहरूसँग भने, ‘हामी चाहन्छौँ–संसद् प्रभावकारी ढङ्गले चलोस् । विधिको शासन भित्र कानुनको परिपालनाको विषयमा हामी कुनै विवाद गर्दैनौँ’, उनले भने, ‘सरकार सत्तापक्षको हुनेछ, संसद् प्रतिपक्षको हुनेछ ।’
उनले संविधानको प्रयोग र कार्यान्वयनमा देखिएका चुनौतीका सवालमा संसदमा उठाउने तयारी गरेको समेत जानकारी दिए । ‘संविधान प्रदत्त नागरिकका मौलिक अधिकार, राजनीतिक अधिकारका सवालमा आवाज बुलन्द गर्नेछौ’, उनले भने, ‘समानताको हकसँग सम्बन्धित अधिकारहरू सही रूपले प्रयोग गर्न सकौँ ।’
