तेहरान । मध्यपूर्वको महत्त्वपूर्ण समुद्री मार्ग होर्मुज जलडमरूमध्यमा एउटा कार्गाे जहाजमा आगलागी भएको छ । यूके मेरिटाइम ट्रेड अपरेसन्स (यूकेएमटीओ)का अनुसार अज्ञात प्रक्षेप्यले प्रहार गरेपछि उक्त जहाजमा आगो लागेको हो ।
समाचार संस्था रोयटर्सका अनुसार जहाजले आपतकालीन सहयोगको अनुरोध गरेको छ र चालकदलका सदस्यहरू जहाज छाडेर सुरक्षित स्थानतर्फ जाने प्रक्रिया सुरु गरेका छन् ।
यसैबिच बुधबार नै यस क्षेत्रमै अर्को एउटा जहाज पनि प्रक्षेप्य प्रहारबाट क्षतिग्रस्त भएको रिपोर्ट आएको यूकेएमटीओले जनाएको छ । विश्लेषकहरूका अनुसार इरानसँग सम्बन्धित युद्धका कारण होर्मुज जलडमरूमध्य क्षेत्रमा सुरक्षा जोखिम तीव्र बनेको छ ।
विश्वको ठुलो भाग तेल आपूर्ति यही मार्गबाट हुने भएकाले यस्ता घटनाले अन्तर्राष्ट्रिय ऊर्जा आपूर्ति र समुद्री व्यापारमा गम्भीर असर पार्न सक्ने चिन्ता व्यक्त गरिएको छ ।
