काठमाडौँ । काठमाडौँको वसन्तपुरमा एक जना ज्येष्ठ नागरिकलाई युवकले अनुहारमा निर्घात कुटेको भिडियो सामाजिक सञ्जालमा भाइरल भएपछि प्रहरीले कुटपिट गर्ने युवकलाई पक्राउ गरेको छ । पक्राउ पर्नेमा चन्द्रागिरि नगरपालिका–१० घर भएका ४२ वर्षीय प्रकाश खत्री छन् ।
कुटपिटमा संलग्न खत्री टुरिस्ट गाइड हुन् । भिडियो सार्वजनिक भएपछि खत्रीलाई पक्राउ गरेर ५ दिनको म्याद लिएर अनुसन्धान थालिएको जिल्ला प्रहरी परिसर काठमाडौँका एसपी पवन भट्टराईले रातोपाटीलाई बताए ।
खत्रीले कुटपिट गरेका ज्येष्ठ नागरिक राम अवतार दास हुन् । ३७ वर्षदेखि ठमेलमा बस्दै आएका पीडित पनि ‘लोकल टुरिस्ट गाइड’ हुन् ।
प्रहरीले खत्रीलाई अभद्र व्यवहार गर्न नहुने कसुरमा जिल्ला प्रशासन कार्यालयबाट म्याद लिएर अनुसन्धान गरिरहेको छ । दुवै जना टुरिस्ट गाइड भएको हुनाले उनीहरूको बिचमा त्यसैबारे विवाद भएको थाहा भएको छ ।
काठमाडौँको पर्यटकीय क्षेत्रमा काम गर्ने टुरिस्ट गाइडहरू ‘काठमाडौँ प्रिजर्भेसन अर्गनाइजेसन’मा आबद्ध छन् । लोकल टुर गाइड बन्न सो संस्थामा आबद्धता अनिवार्य गरिएको छ ।
तर, राम अवतार दास सो संस्थामा आबद्ध नभईकन गाइडको काम गरेको भन्दै खत्रीले आपत्ति जनाउँदै आएका थिए । अनुसन्धान संलग्न एक जना अधिकृत भन्छन्, ‘पहिलेदेखि नै खत्रीले पीडितको आबद्धता र कार्डबारे प्रश्न उठाएको देखिन्छ ।’
‘काठमाडौँ प्रिजर्भेसन अर्गनाइजेसन’मा आबद्ध भएर परिचयपत्र लिन अस्वीकार गरेको भन्दै दासलाई खत्रीले कुटपिट गरेको प्रहरीको अनुसन्धान निष्कर्ष छ । अनुसन्धानमा संलग्न प्रहरी अधिकृत भन्छन्, ‘टुरिस्ट गाइडको परिचय पत्रको इस्यु र अर्गनाइजेसनमा आबद्धता नभएको विषयमा विवाद भएको देखिन्छ ।’
आरोपीमाथि प्रहरी वृत्त जनसेवाले अनुसन्धान गरिरहेको छ ।
