काठमाण्डाै – अस्ट्रेलिया सरकारले इरानी महिला फुटबल टोलीका थप दुई सदस्यलाई शरण दिएको छ । सुरक्षा कारण देखाउँदै घर फर्किन नसकेका एक खेलाडी र कर्मचारीलाई मानवीय भिसा प्रदान गरेको अस्ट्रेलियाका गृहमन्त्री टोनी बर्कले बताउनुभएको छ ।
यसअघि सरकारले हिजो पाँच इरानी महिला फुटबल खेलाडीलाई शरण दिएको थियो । एशियन कपबाट बाहिरिएपछि इरानी महिला फुटबल टोलीका सदस्यहरू घर फर्कनुपर्ने थियो तर गएको हप्ता दक्षिण कोरियासँगको खेलअघि टोलीले राष्ट्रिय गान गाउन अस्वीकार गरेपछि समर्थकहरूले उनीहरूको सुरक्षाका लागि चिन्ता व्यक्त गरेका थिए ।
यो घटनापछि इरानभरि आलोचना बढेको छ । एक रूढिवादी टिप्पणीकारले टोलीलाई युद्धकालीन देशद्रोही भएको आरोप लगाउँदै कठोर सजायका लागि जोड दिएका छन् ।
अस्ट्रेलियाको मानवीय भिसा कार्यक्रमले शरणार्थी र मानवीय आवश्यकतामा परेका मानिसहरूलाई स्थायी सुरक्षा प्रदान गर्दछ । त्यस्तो भिसा भएकाहरूले अस्ट्रेलियामा बस्न, काम गर्न र अध्ययन गर्न सक्छन् ।
