पोखरा । कास्की क्षेत्र नम्बर १ बाट राष्ट्रिय स्वतन्त्र पार्टीका खडकराज पौडेल (गनेस) विजयी भएका छन् । उनी २१ हजार २ सय ९४ मतान्तरले विजयी भए ।
पौडेलले ३० हजार ४ सय ८१ मत ल्याउँदा निकटतम प्रतिस्पर्धी काँग्रेसका तिलक रानाभाटले ९ हजार १ सय ८७ मत ल्याए । तेस्रो भएको नेकपा एमालेका बैनबहादुर अधिकारीले ८ हजार ७ सय ६१ मत पाएका छन् ।
नेपाली कम्युनिष्ट पार्टीका राजकाजी गुरुङ करणले १ हजार ९ सय ९२ मत प्राप्त गरे । हर्क साम्पाङको श्रम संस्कृति पार्टीबाट उम्मेद्वारी दिएका विलबहादुर लामाले ९ सय ५८ मत ल्याउँदा राप्रपाका बाबुराम थापाले ७ सय २७ मत ल्याए ।
उज्यालो नेपाल पार्टीकी मनिषा द्धाले ५ सय ६१ मत ल्याउने बाहेक बाँकी उम्मेद्वारले १ सय मत पनि कटाएनन् । विजयी भएका पौडेल साहित्यमा प्रख्यात छन् । उनी यसअघि अटेरी अभियान मार्फत पोखरा महानगरपालिकाको मेयर चुनाव लडेका थिए ।
