कांग्रेस विवाद मुद्दा : विश्वले बहस गर्नै पाएनन्, आजै निर्णय आउनसक्ने
४ वैशाख, काठमाडौं । नेपाली कांग्रेसको आधिकारिकता विवाद सम्बन्धी रिटमा आज पनि सर्वोच्च अदालतमा सुनुवाइ चलिरहेको छ । सर्वोच्च अदालतका न्यायाधीशद्वय शारंगा सुवेदी र नृपध्वज निरौलाको संयुक्त इजलासमा हिजोबाट सुनुवाइ सुरु भएको थियो ।
हालसम्मको सुनुवाइमा रिट निवेदक पक्ष र विपक्षका वकिलहरूले बहस गरिसकेका छन् । विपक्षका तर्फबाट कांग्रेस उपसभापति विश्वप्रकाश शर्मा आफै बहस गर्न भनेर इजलासमा पुगेका थिए । तर, समय अभावका कारण उनले बहस गर्न भने पाएनन् ।
यही कारण सम्भवत: यो रिटमा आजै फैसला आउनसक्ने देखिएको छ ।
विशेष महाधिवेशनबाट चयन भएको कार्यसमितिलाई निर्वाचन आयोगले वैधानिकता प्रदान गरेको थियो । त्यसपछि आयोगको सो निर्णयविरुद्ध देउवासहित उनको कार्यसमितिका तत्कालीन कार्यवाहक सभापति पूर्णबहादुर खड्का सर्वोच्च अदालत पुगेका थिए ।
यही मुद्दामा अहिले सुनुवाइ भइरहेको हो ।
