तेहरान । इरानका सर्वोच्च नेता आयतुल्ला अली खामेनीका वरिष्ठ सल्लाहकार कमल खाराजीको निधन भएको छ । यसै महिनाको सुरुमा भएको आक्रमणमा घाइते भएका उनको निधन भएको हो
इरानको सरकारी सञ्चारमाध्यमका अनुसार अमेरिकी–जायोनिस्ट शत्रुले उनको घरलाई लक्षित गर्दै गरेको आक्रमणमा घाइते भएका खाराजीको बिहीबार मृत्यु भएको हो । उक्त आक्रमणलाई इरानले अमेरिका र इजरायलसँग जोड्दै आएको छ ।
आक्रमणमा खाराजीकी पत्नीको घटनास्थलमै मृत्यु भएको थियो भने उनी गम्भीर घाइते भएका थिए । उनलाई तत्काल अस्पताल भर्ना गरिएको थियो । चिकित्सकीय उपचारका क्रममा उनको अवस्था झन् बिग्रिँदै गएको बताइएको थियो ।
यसैबिच, केही साताअघि सीएनएनका फ्रेडरिक प्लेइटजेनसँगको विशेष अन्तर्वार्तामा खाराजीले इरानले दीर्घकालसम्म युद्ध धान्न सक्ने विश्वास व्यक्त गरेका थिए । उनले कूटनीतिक समाधानको सम्भावना कम रहेको बताउँदै युद्ध अन्ततः आर्थिक दबाबका कारण टुङ्गिने दाबी गरेका थिए ।
