काठमाडौँ । नेपाल निर्माण व्यवसायी महासङ्घको १३ औँ अधिवेशनबाट निर्वाचित नयाँ कार्यसमितिले औपचारिक रूपमा पद तथा गोपनीयताको शपथ ग्रहण गरेको छ। सोमबार बिहान अनामनगरस्थित महासङ्घको केन्द्रीय कार्यालयमा आयोजित एक विशेष समारोहका बिच नवनिर्वाचित अध्यक्ष निकोलश पाण्डेसहितका पदाधिकारी तथा सदस्यहरूले आफ्नो कार्यभार सम्हाल्ने प्रतिबद्धताका साथ शपथ लिएका हुन्।
महासङ्घको आगामी कार्यकालका लागि चुनिएको यो टिमले निर्माण क्षेत्रको खस्कँदो गरिमालाई उकास्ने र व्यवसायीहरूको हकहितका लागि दृढ भएर लाग्ने अठोट व्यक्त गरेको छ। शपथ ग्रहण कार्यक्रममा महासङ्घका पूर्व अध्यक्षहरू, विभिन्न जिल्ला तथा प्रदेशका प्रतिनिधिहरू र सरोकारवाला निकायका व्यक्तित्वहरूको बाक्लो उपस्थिति रहेको थियो। अधिवेशनले निर्माण व्यवसायीहरूका बिचमा आपसी एकता र सहकार्यको नयाँ ऊर्जा सञ्चार गरेको सहभागीहरूले बताएका छन्।
नयाँ कार्यसमितिमा निकोलश पाण्डेले अध्यक्षको जिम्मेवारी पाउँदा महासचिवमा शिवहरि घिमिरे निर्वाचित भएका छन्। त्यसैगरी कोशी प्रदेश उपाध्यक्षमा धिरेन्द्र दाहाल, मधेस प्रदेशमा शम्भु ठाकुर, बागमतीमा बालकृष्ण थापा, गण्डकीमा खिमप्रकाश मल्ल, लुम्बिनीमा शहदेव खड्का, कर्णालीमा हिमबहादुर बुढा र सुदूरपश्चिम प्रदेश उपाध्यक्षमा प्रकाशबहादुर शेट्टीले विजय हासिल गरेका छन्।
महिला उपाध्यक्षको पदमा गङ्गा पोखरेल निर्वाचित भएकी छिन् भने नीतिगत उपमहासचिवमा मंगल शाही र आन्तरिक उपमहासचिवमा सन्तोष साहले जिम्मेवारी पाएका छन्। आर्थिक व्यवस्थापनको मुख्य जिम्मेवारीमा कोषाध्यक्षका रूपमा उज्ज्वल गौतम र सहकोषाध्यक्षमा उपेन्द्र घिसिङ चुनिएका छन्।
