वासिङ्टन डिसी । मध्यपूर्वमा बढ्दै गएको युद्धका कारण तेलको मूल्य आकाशिएपछि विश्व बजारमा अमेरिकी डलरको मूल्य ह्वात्तै बढेको छ। लामो समयसम्म युद्ध लम्बिने र यसले ऊर्जा आपूर्तिमा अवरोध पुर्याई विश्वव्यापी आर्थिक वृद्धिलाई असर गर्ने डरले लगानीकर्ताहरू सुरक्षित मानिने डलरतर्फ आकर्षित भएका हुन्।
सोमबार अन्तर्राष्ट्रिय बजारमा डलरको माग उच्च देखिएको छ। एसियाली बजारमा सोमबार कच्चा तेलको मूल्य प्रतिब्यारेल १२० डलरको नजिक पुगेको थियो। यद्यपि, जी-७ का अर्थमन्त्रीहरूले आपतकालीन भण्डारबाट तेल निकाल्ने विषयमा छलफल गर्ने समाचार बाहिरिएपछि मूल्यमा सामान्य गिरावट आएको छ।
तेलको मूल्य वृद्धिसँगै युरो, स्टर्लिङ पाउन्ड र अस्ट्रेलियन डलरको मूल्यमा ०.६ देखि ०.७ प्रतिशतसम्म गिरावट आएको छ। अमेरिका ऊर्जा निर्यात गर्ने मुलुक भएकाले पनि युरोपेली देशहरूको तुलनामा डलर बढी सुरक्षित र बलियो देखिएको हो।
बजार विश्लेषकहरूका अनुसार इन्धनको मूल्य वृद्धिले विश्वव्यापी मुद्रास्फीति बढाउने र आर्थिक वृद्धि रोक्ने डरले लगानीकर्ताहरू जोखिम मोल्न चाहिरहेका छैनन्। विशेष गरी मध्यपूर्वको तेल र ग्यासमा बढी निर्भर रहने एसियाली क्षेत्र यस ऊर्जा संकटबाट सबैभन्दा बढी प्रभावित हुने देखिएको छ।
इरानले आफ्नो कट्टरपन्थी अडान कायम राख्दै उत्तराधिकारी घोषणा गरेको र ओमान खाडीको जलमार्गमा आक्रमण जारी राखेका कारण विश्वको झण्डै २० प्रतिशत इन्धन आपूर्तिमा अवरोध पुगेको छ।
कतारका ऊर्जा मन्त्रीले खाडीका ऊर्जा उत्पादकहरूले निर्यात ठप्प पार्न सक्ने चेतावनी दिएका छन्, जसले गर्दा तेलको मूल्य प्रतिब्यारेल १५० डलरसम्म पुग्न सक्ने अनुमान गरिएको छ। उच्च ऊर्जा मूल्यले करको जस्तै काम गर्ने र महँगी बढाउने हुँदा केन्द्रीय बैंकहरूले ब्याजदर घटाउने सम्भावना पनि कम हुँदै गएको छ। यसले गर्दा आगामी साताहरूमा विश्व बजार अझै अस्थिर र चुनौतीपूर्ण बन्ने देखिएको छ।
